由爾冬陞監製、古天樂、宣萱、顏卓靈、薛凱琪等演出嘅本土電影《犯罪現場》日前煞科，甚少飲酒嘅宣萱在現場高漲氣氛下，與眾演員乾杯，結果半醉半醒完成最後一場戲。
當晚深夜時份，有份參演拍攝嘅姜皓文、麥長青、陳國邦等到現場探班，支持導演及本土製作，監製爾冬陞攞住酒杯帶頭「吹喇叭」，幾位老人家特約演員捉住古仔、宣萱合照，連麥包都趁機同大家影相留念。
開香檳慶祝後，宣萱即埋位演出最後一場戲，向來酒量淺嘅佢半醉開工，笑說：「初初飲酒我都冇事，後來古仔走埋嚟再倒多大半杯畀我，同我乾杯就出事啦，個人開始傻笑！點知反而拍出嚟效果好好，因為場戲講我視力有問題，飲咗酒對眼有啲focus唔到，導演仲話早知每次飲少少酒先拍啦！」
繼大台劇《尋秦記》後再次同古仔合作，宣萱坦言：「初初開工都有啲擔心，古仔喺現場好認真，拍多兩日之後，發現古仔依然係古仔，有咩事都有傾有講，所以所有嘢都好舒服好順利！」
精選娛聞，喺晒《娛果》
http://fb.com/appledailyent
