請Mimi一個有全家嚟撐場！
藝人羅敏莊（Mimi）到沙田出席亮燈晚會，老公陳國邦及女兒陳禛到場支持。陳國邦謂不論自己或是Mimi出席活動，全家人都會到場支持。
Mimi透露囡囡下周五開始放聖誕假，問到會否到外地旅行，她透露將到曼谷兩星期，早前於當地置業的Mimi笑說：「我當返鄉下，同埋我怕凍，依家香港嘅天氣都覺得凍。（過埋今個月30號生日先返香港？）唔係，因為31號係搵錢嘅日子。」
問到陳國邦會如何為太太慶祝生日，他笑說：「我哋兩個連結婚周年紀念都唔記得。」Mimi亦說：「所以平時都冇乜慶祝，都係啲朋友係社交網站提我。」至於陳國邦會否親自下廚煮生日飯，Mimi笑言：「如果係佢煮我會驚，哈哈！」
來源：on.cc東網
【43歲生日】老公下廚煮飯慶祝？ 羅敏莊：佢煮，我唔敢食
羅敏莊、李龍基、田蕊妮等，噚晚喺沙田出席節目燈飾亮燈晚會，羅敏莊同老公陳國邦都係新界之友，所以佢哋嘅屋企人仲有囡囡陳禛都有到場支持，羅敏莊話囡囡嚟緊放兩星期聖誕假，到時一家會去曼谷玩五日，不過陳國邦話自己冇咩旅行癮，只係想有個地方休息吓。羅敏莊笑話之前去咗韓國玩，因為天氣太凍，怕咗去凍嘅地方，所以揀番個熱辣辣嘅地方度假。
今個月30號係羅敏莊嘅43歲生日，問到點慶祝？陳國邦話：「我哋兩個好少記住呢啲日子，之前結婚周年紀念日都語記得咗，都係朋友提起至醒起結婚八周年，最重要係一家人開開心心。」羅敏莊就話到時一家人食餐飯當慶祝，問到係咪老公下廚？羅敏莊即笑話：「佢煮，我唔敢食。」
田蕊妮好友賴慰玲日前出咗個B仔，阿田話：「BB好得意，個樣似老公，鬼仔樣，成個粉團咁，好man，好叻，探佢時成晚冇喊，我送咗張包被仔畀BB。我哋住得好近，我同賴慰玲講如果悶可以去陪佢，點知佢話唔悶，反而話如果我悶，可以去探佢。」
更多娛聞，喺晒《娛果》
http://fb.com/appledailyent