藝人陳國邦與太太羅敏莊帶同囡囡陳禛行婚紗騷，羅敏莊說：「第一次一家三口一齊行騷，之前我同陳禛行過一次，佢好鍾意，喺屋企成日問我幾時再有得行，今次畀佢試多次，證明佢真係好恨行，同埋唔怯場。表演欲佢係有嘅，至於怕唔怕醜就要睇心情，心情唔好就唔肯做，如果佢好似頭先喊緊嘅話，就拎朱古力都氹佢唔到。」
羅敏莊續表示：「囡囡好貪靚，會用佢啲無色嘅玩具顏料扮化妝，我無教過佢點化，不過佢睇得多，次前都有帶佢去化妝間，佢睇完就識自己畫，化得好似。（畀唔畀佢入行？）睇佢鍾唔鍾意。（如果有人搵佢拍廣告或者出鏡？）我會問佢先，雖然我啲朋友話問佢都唔識，但其實佢係識嘅，佢有決定權，同埋要畀時間小朋友適應，如果拍得好急或者辛苦就要考慮。」
