“我仍然好想做男主角
仍然好想攞獎
亦希望藝術成就可以更上一層樓
但相比年輕時心態已好唔同
依家唔會埋怨或抵賴
唔會將情緒遷怒在別人身上
或轉嫁去其他事上”
陳國邦說，這兩年來，他只拍了四天戲。現正播映中的ViuTV劇集《三命》，他的戲份早已在兩年前拍完。
兩年只拍了四天戲？我以為我聽錯，陳國邦再證實一次，真的只有四天。演員這條路，也太難行了吧！儘管如此，他不相信這是宿命。
「一個人嘅命運其實係由好多人去決定，我哋每個選擇，都牽涉其他人嘅選擇，所以我唔信宿命論。」
以上不是《三命》宣傳，陳國邦的確是如此認為。幸好他不信宿命，否則會活得很苦。
演藝學院畢業後默默耕耘了三十多年，有過很多希望與失望，也執着過某些位置和獎項。從來沒嚐過男主角滋味，也沒享受過序有應得，看似宿命難違，其實不過是你在選擇人，人亦在選擇你的一場角力遊戲。
現時他在浸大擔任客席講師，執了教鞭之後反而放下了昔日的執著，找到了尊重，也尋回了初心。加上身邊多了女兒陳禛，有些任務在人生清單上必須置頂。
「所有寄望都放在我個女身上，我同太太而家做嘅一切，都係希望佢將來唔需要經歷我嘅傷痛或失敗，就可以做到佢鍾意做嘅事。」
命是天生，運是後天選擇，陳禛的路未必一定平坦，但至少有得揀，陳國邦於願足矣。其次的，都是其次。
演戲是一門學問
陳國邦在浸大電影學院教表演已有十年，從中找到了尊重和快樂。
「我唔太清楚當年係邊個提議搵我，後來主任話我知，原來在同一時間，校內校外都有人提起陳國邦，其中一位係已故嘅廖啟智先生。我相信浸大搵我唔係因為我知名度或某個劇集角色突出，去到大學層面，最後都要視乎能力，好多謝佢哋認同我有咁嘅能力。至少我係咁諗，咁會教得開心啲！」
學院派出身的他邏輯性強，思路敏捷清晰，絕對是教書的材料。
「演戲係一門學問，最初接受呢個崗位時，係當自己飾演一位老師，既然我教表演，點解唔用表演嘅狀態去教？溫故知新，一路教自己都一路有得着。」
詛咒老婆為熄機
他有條好橋，可以叫學生不玩手機，甚至熄電話。
「我同學生講，我而家熄咗電話，就算Mimi （太太羅敏莊）發生交通意外，我本來可以見佢最後一面，我亦唔會知，但我唔會後悔！人生在每個時候就做每個時候嘅嘢，而家我上緊堂，如果仍抱住可能有緊要事搵我呢，可能有戲揾我拍呢⋯⋯咁我永遠離唔開呢個電話。我已經詛咒我屋企人喇，希望你哋都可以在上堂時放低電話。」
我唔差吖！
陳國邦現在的生活其實頗充實愜意，但畢竟是位演員，大學不是他最渴望的舞台。
「學校有叫過我做全職，但我始終鍾意做戲。」
他是公認好戲之人，89年第一部電影《壯志雄心》已獲提名台灣金馬獎最佳男配角，95年憑《飛虎雄心》獲提名香港電影金像獎最佳男配角。機會是有的，生活不是問題；只可惜跟他所追求「紅」，還是差很遠。
「開頭兩部戲都有提名，又有人認同，點講都好，我唔差吖！在我年青人嘅世界裏，覺得自己好叻，人哋亦覺得我好叻，但點解我一直做唔到主角？一直浮浮沉沉半紅不黑？」
以為可以做黎耀祥
入了電視台，這問題也一直困擾着他。鬱鬱寡歡了很多年，自覺龍游淺水，皆因以為電視台就是全世界。
「試過好多次見到一啲希望，甚至有電視台高層特登約我出去食飯，同我講『下部戲阿邦你係主角㗎啦！』以為可以好似黎耀祥咁，終於等到啦，結果再開劇時冇咗消息，呢啲情況仲要唔止一次！有段好長時間，心情一直起起伏伏。」
主角滋味沒嘗過，空歡喜卻是一場又一場。安慰獎是一些男配角提名，最接近得獎那次是2012年《大太監》的彭三順，他入圍男配角最後兩強，僅敗於古明華。
「演戲嗰團火已變得好暗淡，差啲熄晒。」
King Sir引導尋找初心
陳國邦命不該絕，就在那團火差點熄滅的時候，遇上昔日老師鍾景輝，令他茅塞頓開。
「有日喺化妝間撞到老師鍾景輝先生，我哋開始閒聊，我話我好心灰意冷，想離開唔做。佢同我講咗一番說話，簡單嚟講就係尋找初心，點解我鍾意做戲？老師一番話點醒咗我。」
多年前我曾訪問過鍾景輝，問他在眾多學生之中最欣賞那幾位？他很認真地想了想，說了幾個名字之後再道：「陳國邦幾好，好有實力。」若不是這次在化妝間偶遇，陳國邦未必會想起恩師。
「King Sir好錫我，當我係仔咁，但我呢個仆街仔畢業之後從來冇搵過佢，打個電話問候都冇⋯⋯」他十分懊悔。
King Sir的一番話令陳國邦重新振作，他跟老師對話這個情景，令他猛然想起《相約星期二》這本書，巧合的是，King Sir 當時正準備演出這個舞台劇，飾演慕理教授。
「當日知道King Sir將會做呢個戲時，我第一時間求佢說服劇團俾我做學生個角色，但因為呢個戲屬於中英劇團，King Sir已經唔係劇團中人，如果搵我嘅話，好難同其他演員交代。兩年之後劇團藝術總監古天農先生再打俾我，《相約星期二》打算重演，但原本飾演學生那位演員撞期，問我介唔介意接手演出？我點止𠼱飯應，直頭係嘔血咁應承呀！當時已許下承諾，只要老師身體承受到，每年呢個戲演出時，我推晒其他工作都一定要上台。」
不會再埋怨
陳國邦在劇中飾演學生明哲，與鍾景輝台上台下皆是師生，有不能言喻的默契。二人於香港、國內、台灣及美加等地巡迴演出了過百場，是獲得最多好評的組合。若不是King Sir在2016年身體出現問題，相信還可以繼續演下去。
「同老師一齊做戲嘅過程中，令我重拾對表演嘅熱誠及追求，一直延續到而家。我團火唔會熄㗎啦，由佢一直燒落去啦！」
環境縱使未變，自己心態可以改變。這不叫妥協，這叫成長。
「我仍然好想做男主角，仍然好想攞獎，亦希望藝術成就可以更上一層樓；但相比年輕時心態已好唔同，依家唔會埋怨或抵賴，唔會將情緒遷怒在別人身上，或轉嫁去其他事上。」
ViuTV好玩好多
心結解開了，不再內耗地懷疑人生。可能就是因為仍有團火，2015年他在社交平台發表千字文「給無綫電視的公開信」，宣布離巢。其中最具代表性的一段是：「我不想看見自己慢慢的變成一潭死水，變黑發臭。我要流動，我要充滿生命。只有我充滿生命力，我的作品才能充滿生命的去感動人，甚或改變人。」
他根本就是一個有底氣的人，要延續演藝生命，必先要離開是是但但之地。近年偶爾會看到陳國邦出現在ViuTV，令人眼前一亮的是2018年《身後事務所》，角色先與盧慧敏談師生戀，後來變為與徐肇平同性戀，劇本絕對可以讓他分析、揣摩、創作。去年《飛黃騰達》客串院長一角，也甚有驚喜。
「ViuTV作為一個主體，可以同其他唔同主體合作，無論在思維、話題方面都可以擴闊好多。雖然戲劇元素一定離唔開恩怨情仇，但可以嘗試好多唔同人生觀嘅恩怨情仇，表演上好玩好多。」
以為我已移民泰國
說回兩年只拍了四天戲這件事，作為演員，情何以堪？
「市道不景，加上好多人以為陳國邦已經移民去泰國，所以冇乜人搵我拍戲。我哋只係送咗個女過泰國讀書，Mimi喺嗰邊照顧佢。我要搵食，梗係留喺香港。」
他們已在曼谷置業，女兒現在那邊國際學校就讀，羅敏莊專注湊女，陳國邦則兩邊飛。
「如果淨係得我哋兩夫婦，我哋唔會離開香港；但有咗個女之後，會希望俾佢見識唔同地方。香港同好多西方國家一樣，已經發展得好成熟，進步空間比較細。我哋覺得泰國有發展空間，同埋幾鍾意當地社會氣氛，人與人見面會合十打招呼，身體語言會影響情緒，就算你本身唔係咁善良，但成日有人同你講你好、多謝、唔該，你慢慢都會被感染，成個人會平和好多。」
女兒鍾意做乜都得
一家人經常分開兩地，每晚香港時間11點都會FaceTime。只要有信任，地域不是問題。況且，兩地根本好近。
「有時晏晝Mimi 會打嚟：『老公好掛住你呀！』總之佢隨時可以搵到我，就算我喺廁所都會聽。我計過，由香港屋企出發，行去搭機場巴士，去到曼谷再轉BTS返屋企，全程以龜速進行，都唔使九個鐘頭。」
女兒現年12歲，遺傳了父母的表演天份，自小能歌善舞，5歲已踏紅館在《福祿壽十週年演唱會》上與契爺阮兆祥合唱《廣播道Fans殺人事件》，之後更在電影《梅艷芳》中扮演童年梅艷芳。
「我哋對佢嘅教育持開放態度，底線只要唔傷害人，將來佢想做乜都得，鍾意男或女都得。就算考試零雞蛋又如何？我細個鍾意打機，俾人打到隻嘢咁；依家打機，分分鐘可以搵好多錢！依家連食飯做直播都可以搵錢，將來個世界點估計到？我同Mimi現在盡量在個女背後做多啲功夫，等佢日後有多啲選擇能力，假如佢鍾意唱歌或演戲可以放膽去試，唔需要為生活而放棄自己興趣。」
打四份工為交學費
盡力為女兒鋪路，皆因自己沒有這個福份。陳國邦很記得，在讀演藝那個年代，要打四份工才夠錢生活及交學費。
「朝早四點開始整蛋撻，中午在學校canteen洗碗，夜晚在藝術中心做帶位，一個星期有兩晚在惠康落貨。曾經有段時間班同學唔敢落canteen食飯，因為見我又執碗又抹枱，怕我尷尬，我同佢哋講，你哋唔嚟食飯我冇嘢撈㗎 ！我提議佢哋食完飯後將碗碟放落tray度，我就做少好多，結果形成咗風氣，之後個個都自動自覺咁做。大家都知我刻苦，老師甚至會批准我企喺度上堂，因為之前落完貨又整完蛋撻，坐喺度實瞓着。」
不怕孤獨
披星戴月的辛勞，有得揀，當然不希望下一代經歷。至於陳國邦自己，雲淡風輕，已有點世外高人的味道。
「我同Mimi兩位一體，開心咪一齊開心死，悶咪一齊悶死囉！最好佢死先，因為冇咗個老公佢會好痛苦。我唔係偉大，我只係唔怕孤獨，就算一個人繼續餘生的話，都有信心承受到。」他笑道。
陳國邦今年57歲，怎樣計，都是得比失多。將來的事，是將來的事。
「我係一個演員，會不停透過戲劇體會到比陳國邦生命更差嘅人。我有一個好好嘅太太，一個我好愛錫嘅女，我會慶幸及珍惜自己擁有嘅一切，亦會好坦然地面對未來。」
時也，命也；慎始，善終；盡人事，聽天命。
撰文：林蕾
攝錄：邱覺達
場地提供：Ask Cafe
來源：娛壹As One