擁有幸福家庭的陳國邦在剛播畢的ViuTV劇集《身後事務所》中破格演出「基民」，跟徐肇平有段同性愛情。除獲網民讚好外，作為老婆兼小Fans的羅敏莊（Mimi）都被老公的演出所感動，畀他超過100分：「佢錫Jeremy(戲中徐肇平角色)係愛嘅表現，錫佢就好似錫緊我咁，我反而冇留意佢錫緊嘅對手係男定女。」她還自爆和老公由朝錫到晚，好有愛。採訪：方騫平
對於老婆讚賞，陳國邦就冷靜地說：「撇開係咪同性戀，都係愛嘅表現，正如愛貓狗，好自然會錫佢哋一樣，所以同徐肇平攬攬錫錫，甚至牀戲都可以好自然流露，當然，正如老師所講演出係缺憾藝術，只可以喺有限條件下做最好，睇返會覺得未夠好，再做可能會更細緻。」Mimi即讚返老公：「但我同朋友都睇到好感動，因為佢演繹嘅係平日對我做嘅嘢，我哋早晚、瞓前、就算路過都會咀啖，有時連囡囡陳禛睇唔過眼會喊停話：『夠嘞！』哈！我哋唔介意喺指引下畀陳禛睇爸爸點樣去演同性戀者角色，反而係佢無興趣去睇。」
目前Mimi主要靠登台賺錢，帶隊到泰國睇樓只為興趣，暫時未係回報時候：「因為要搞好成交，分到佣，再同地產公司拆帳，點夠唱歌好賺？只不過睇泰國樓係興趣嚟，既然冇能力再負擔香港樓唯有睇遠啲，不過我哋好好彩，早年買落複式村屋單位都叫有瓦遮頭，唔使憂，o依家連500萬嘅上樓盤都買唔起喇。我哋兩公婆有個終極目標，等時囡囡出外讀書，我哋唔使做可以喺泰國嘅小島度過住寫意退休生活。」
來源 : 星島頭條