大台說陳國邦回巢拍《包青天》，所以陳國邦唔只一早做晒前期準備,更已經試好造型、影埋TVB年曆海報。喺浸大教戲劇嘅佢，更為咗嚟緊十二月專心開劇，向學校請定假，仲推埋其他搵錢嘅jobs。「其實喺傾談過程中,《包青天》需要拍五個幾月,我因為咁推咗兩個工作，一個一月一個二月，所以個付出唔係話取消就取消，其實究竟有冇尊重過演員呢?」陳國邦說。
講真，點估到大台突然出招至得吖，話晒一五年就算陳國邦寫咗封公開信俾大台，依然可以返去拍《八時入席》，因為好多監製知道阿邦有料。而且一直自由身嘅佢，過去兩年都有幫其他電視台拍嘢，好似奇妙電視嘅《冇大冇細》咁，當時大台都有「方丈」上身。加上阿邦有講過自己拍緊ViuTV劇，當時監製都話無問題，所以先開晒會拍板話用，然後一連串試造型、影年暦等等。
「咁當然有唔開心有失望，但主要原因唔係失去一個演出機會，而係由傾劇本到造型，之後再去影年暦，TVB高層或整個製作團隊，唔會話喺唔認同之下進行，但經過一後時間，做咗咁多嘢之後，因為我拍咗另一個
電視台劇集，正如你所講，我又冇合約在身，點解本來認為我係適合演公孫策，到突然間變得唔適合而要換人呢?」
聽聞大台已經搵咗人頂替陳國邦架喇，既然jobs已推，浸大嗰邊又請埋假，唯有當放個悠長假期多啲陪下陳禛啦。