繼羅嘉良答應捱義氣返港撐台慶，但被臨門彈鐘後，又有一位苦主被「方丈」揀中，佢就係陳國邦。唔只新劇《包青天》被踢，就連《公公出埠》都out走，死因係高層唔like佢現身ViuTV。吓，陳國邦唔係「方丈」條o靚，自由身無約架喎，咁都得罪「方丈」？對此，陳國邦好無奈：「TVB成日話演員係重要資產，又係行頭大哥，可唔可以俾啲尊重演員呢？唔好呼之則來，揮之則去。」
話說大台幾個月前已經開始籌備重拍經典劇《包青天》，包大人一角仲搵嚟狄龍個仔譚俊彥接老豆棒，至於佢嘅左右手──「展昭」同「公孫策」，就分別由張振朗同自由身嘅陳國邦孭飛。除咗《包青天》，曹永廉同黃浩然都已經喺大台節目巡禮預告，會聯同陳國邦等五個大太監，齊腳拍旅遊節目《公公出埠》。點知十月尾，一個月黑風高裁人夜，唔使用劍嘅，大台高層一句唔likey就得啦。無論《包青天》定係《公公出埠》，陳國邦通統無得留低！至於死因，大台都無直接向陳國邦解釋。
「佢係通知我經理人公司，話係因為我出席咗ViuTV嘅劇集宣傳。我覺得出席劇集宣傳係演員責任，但我做完呢個劇集宣傳後，就產生換角呢件事，連同本來安排好、度好晒期嘅幾個公公去旅行，都突然之間抽起咗。」陳國邦說。
另外，大台又解釋，話驚陳國邦喺ViuTV套《身後事務所》，會同《包青天》同步播放影響收視。陳國邦回應話：「我喺ViuTV嘅工作，上個月已經完成喇。如果《包青天》要播出，首先要拍到出年5月，跟住再做後期工作，到出街都成年之後嘅事，我諗唔明個抵觸喺邊度。」
對比起陳國邦2015年離開大台時，寫公開信鬧爆無綫，今次佢明顯冷靜好多。
「無綫形象喺觀眾心目中重要，對大老闆嚟講都好重要。究竟想一間公司賺錢，但成日俾人鬧好啲呢？定係又賺錢又俾人讚好呢？其實我想藉呢個機會，向部份明白事理嘅高層講聲，TVB成日話演員係重要資產，TVB又係行頭大哥，咁可唔可以俾啲尊重演員呢？唔好呼之則來揮之則去。」