藝人陳國邦、湯盈盈、李霖恩等出席處境處《愛·回家之八時入席》宣傳，適逢父親節，不少星二代也齊齊出動，不過當中以陳國邦女兒陳禛最為搶鏡，甫到場即上台狂擺甫士，可愛非常，而盈盈大女則較為黐身，即使盈盈於玩遊戲期間，女兒也要拉住其後腳走，任司儀的霖恩亦被一對仔女於台上攬到實，狀甚溫馨。
陳國邦囡囡搶晒鏡
對於女兒在台上搶盡風頭，國邦笑謂：「佢臨時縮沙唔肯唱歌呢，頭先仲同太太喺車度練歌，所以話佢都好睇心情。（喺學校都咁active？）佢係活潑，鍾意表演，但學校都唔只佢係咁嘅，其實由細佢都習慣咗面對咁多人，所以好自然。」更指今晚將兩家人食飯慶祝父親節。
自爆拉頭馬蝦碌事
而盈盈則透露老公錢嘉樂終能趕及今晚返港，現正與老爺、奶奶坐住飛機由上海回來，她謂：「我臨時臨急買蛋糕同訂枱食飯，同埋之前已托劇組同事幫我畫一幅一家四口嘅卡通全家福送畀嘉樂。」
談到日前到馬場拉頭馬，盈盈笑指乃朋友出錢幫她買，結果幾個人共贏得六位數字，她更自爆瘀事：「拉頭馬時見地下有條繩咪執上嚟拎住，即刻畀朋友笑，等我仲叫埋周家蔚同郭少芸拎住添。」對於好姊妹梁靖琪似蜜運中，盈盈即謂：「佢好多男友喎，咁好姊妹當然有分享呢啲嘢。（過咗你哋嗰關未？）都ok嘅，畀佢發展吓先，唔使咁心急嘅，睇啱先。」
