睇你年紀，出嚟打工都打咗幾年。呢幾年，腦細日日問候你，有時仲會問候埋你娘親，原因可能無聊到你唔想提，甚至唔關你事!但佢冇聽你解釋，從此雪藏你。你做嘅嘢，佢冇睇過就話「唔掂」、「冇可能係咁做」;你問佢嘢，但只會西起塊面答你「下?咩話?」搞到你唔敢再問落去。你諗過劈炮，不過你冇，因為你覺得市道差，寧願著多條底褲返工，都想搵到第二份工先走。
點知拖下拖下，你慢慢患上斯德哥爾摩症候群，開始幫腦細搵藉口:「其實但對我咁嚴，只不過培育我啫。」跟手熄咗求職網，今晚繼續食住杯麵OT。其實劈炮好易，只要你唔跳草裙舞，夠膽遞辭職信，全公司即刻敬你七分。而最重要係―你唔撥走爛茶渣，邊有機會沖雨前龍井?嗱，我有個朋友，佢叫陳國邦，演技絕佳但苦無機會，啱啱喺全行最大嘅大台辭職另覓天地!
只要你聽佢講，就知道自己應該劈定唔劈，同埋辭職唔怕遲嘅道理。
最後，毛孩祝你可以早日同腦細講:「我以前有冇揀，我而家想揀返做個人。」
係劈係留，自己决定
其實幾時先考慮劈炮，要基於幾個因素，包括喺一間機構嘅工作時間相對較長；工作能力相對教較強；而機會相對較少，咁先會出現劈炮嘅感覺。呢三個因素，缺一不可。你有能力但做得唔耐，未有機會都仲可以等。
但你能力強加上時間耐仲要冇機會，咁就要考慮下離開。咁點先叫耐?要睇你年紀承受到幾多，打個比喻，最大心率嘅公式係「220減去年齡」，咁好似我因因咁得3歲，可以承受到較多心跳。但相同心跳數量換著我哋?瓜咗啦!所以要睇下自己年紀，如果你10歲就入行，做咗12年，可能都仲有好多時間。
連自己唔開心都發現唔到
對於我離開TVB，屋企人有咩反應？我因為陳禎就冇乜反應呀，因為太細個，哈哈！而我老婆呢，個決定某程度上係有份慫恿嘅。但佢察覺到我唔開心，唔係話我工作完返到去黑口黑面，工作都有開心事，但係有啲細微嘅變化連我自己都唔知，但係佢察覺到。其實上年、前年、三年前，佢都會問我：「你使唔使考慮下仲係咪留喺度嘗試？」最後，我就做咗呢個決定。
對唔住，我係演員
有啲圈內朋友公開表態支持自己，係我估唔到，窩心一定有。我相信自己嘅專業態度，工作上嘅讚賞一直存在，所以形成點解我想試下做主角。我做好多二三線角色，都有人記得。用返數學原理計個比例，你做二十場戲都有咁嘅表現，如果有八十場戲，你可以發揮能力，帶出嘅信息咪更多？李斯、文種、漢邦、司徒佳，我都做得好開心，但戲份問題，容易被忽略。而另一個感覺，係我估唔到封信對TVB有咁大殺傷力，我有諗過鬧同怨，但原來採取一個冷靜態度，比起一封鬧得好狠嘅信，殺傷力更大。演員一個一個走，好戲嘅人冇機會。呢種問題存在好耐，觀眾都睇到，我覺得自己件事係形成一個缺口，或者一道門，畀佢哋留低自己嘅意見。
我有試過，我真係有爭取過
我有爭取過，試過改變自己，食多啲飯，同某個高層多啲一齊，我好集中火力㗎！橫掂都係，梗係搵個話得事！但係一年之後我冇再咁做，到有一日再見嗰個高層，我同佢講：「我而家同你講嘢舒服好多。」之後我講畀自己聽，同埋多啲時間同佢相處，一齊應酬，自然會知多咗嘢，甚至見到其他人，會諗「又真係你需要幫多過我。」其實佢好多人都要照顧，佢都有佢嘅難處。雖然好多人覺得我唔抵，但係我好平和，因為經歷太多。但要記住，當你有能力幫人，公司點解唔點用你？但忠心有能力嘅人往往就係唔出聲嗰啲人。唔出聲係一個缺點，有咗任何嘢之後就會明白，工作上想要咩，一定要出聲。
「如果」嘅嘢，邊個知呀？
我第一部電影《壯志雄心》就被提名金馬獎最佳男配角，曾經都諗過自己嘅事業應該一帆風順，但起步環境太好，贏在起跑線，點知輸在中途！中途唔一定未完，哈哈。但我又會諗，如果一開始就風調雨順，捱埋男配角，可能之後會有好多主角，好有錢，但性格冇機會變到日中無人，唔識得尊重人，亦唔識得尊重自己，自大。我唔可以評價一個冇出現過嘅生命，不同我嘅人生哲學，錯誤先學習得到，先有今日嘅體會，一個平和嘅心態。
我想做演員，可唔可以界個機會?
有人問我咁大膽離開大台，係咪已經有一連串工作計劃?其實當時我手頭上除咗《相約星期二》呢套舞台劇，咩都冇。
不過我唔會視《相約星期二》為工作，我今次都係推咗部電視劇去演呢部舞台劇，只要我經濟範圍下容可，我可以咩都唔做，咩都推，淨係做呢部劇，一直演落去。呢個劇嘅信息好好，對我有意義。而飾演我老師概就係 King Sir，現實中作係我老師。成個故事同我地嘅經歷、師生關係、嗰種情感實在太相似!06、07年我曾經想離開，我同自己講做咕喱都唔做戲，做咩都唔做戲，你諗下傷害性幾大?但同King Sir 傾完之後，我決定留低繼續演。到今日我都抱住一個信念，有邊度需要陳國邦，我就去。
100毛 20151022
