陳國邦同羅敏莊結婚四年，去年 10月在羅敏莊懷孕時，一家三口由西貢搬去現址。客廳景觀開揚，是兩夫婦湊B及玩貓的地方。
結婚 4年的陳國邦與羅敏莊（ Mimi），家中養了 9隻貓，是娛圈出名的貓癡。去年羅敏莊為了女兒陳禛和愛貓有更多活動空間，在生 B前一家人搬入位於大埔半山區的滌濤山。搬入新居，女兒出世令陳國邦父愛氾濫，但兩夫婦愛貓之情並未改變。
陳宅是3房2廳的一千呎單位，一家三口與九隻貓咪就在這裏築起他們的溫馨小天地。陳國邦在鏡頭前後一向沉默寡言，但對住囡囡陳禛，卻父愛大爆發。在訪問過程中，羅敏莊不時哼着兒歌，陳國邦就瞇起雙眼將女兒抱起，逗得7個月大的陳禛笑個不停。
陳國邦同囡囡沖涼、換片都好熟手，認真廿四孝，而羅敏莊就笑說：「囡囡好有音樂感，我哋成日都會對住囡囡唱兒歌，佢個身就會跟住節拍咁郁，所以我哋特登將iPad掛喺BB牀尾，等佢無時無刻都睇到卡通及音樂！」
去年陳國邦專登考船牌，都是希望日後可以自己親自揸船同囡囡共享天倫樂，多點接觸大自然。「以前住西貢，成日都同老婆同村民出去游水。我好享受出海，依家考咗個船牌，就可以揸船帶老婆同囡囡出海玩。考船牌最主要都係考海上知識同守則，不過我依家考嗰種只係最低級嗰隻。」陳國邦說。
一家十二口
陳宅還有 9隻貓咪。去年初，羅敏莊意外懷孕，兩夫婦即使在親戚朋友反對下，仍堅持與愛貓生活。不過當記者到訪，多數貓咪都怕羞地躲起來，影不到九隻合照，只有「細貓」跳上梳化撩羅敏莊玩。
羅敏莊說：「『細貓』係我同老公收養嘅第一隻貓。以前我哋住西貢，『細貓』成日跟住我哋，後來知道佢冇人養就帶咗佢返屋企。『細貓』係屋企嘅 PR，唔驚人，一有客人來都會幫手招呼，好聽話！」
陳禛出世後，兩公婆雖然比以前更注重家居清潔，每日至少吸兩次塵，但與貓咪相處方式一切如常，夫婦照樣和貓咪同牀睡覺，用行動令貓兒明白，陳禛這位新住客並沒有分薄主人對牠們的愛心。
「我唔認為生小朋友同養寵物有衝突，只要做好清潔就 OK。囡囡出世之後都同貓咪相處得好開心，我唔覺貓咪有呷醋。我兩公婆冇分隔囡囡同貓咪，陳禛會主動同貓咪玩，佢摸完貓咪隻手有貓毛，我哋咪第一時間清潔囉。其實等囡囡多啲接觸小動物，可以培養佢嘅愛心。」羅敏莊說。
看來，一班「舊屋主」同陳禛呢位「新住客」相處融洽，羅敏莊夫婦飲得杯落！
齊全廚房
撰文：張樂施
攝影：李梓軒
錄像：盧芷斌