藝人徐榮與18個月大女兒徐心怡（包包）、羅敏莊與4歲女兒陳禛到馬鞍山出席商場活動，兩位小朋友表情多多，上演一場萌爆大鬥法，她們又一齊玩波波池，真是可愛到爆燈！開始學行的包包超有好奇心，滿場飛進行探索，又識將波波交到爸爸手上，其後徐榮與包包設計朱古力復活蛋，包包有樣學樣識得唧食用顏料，認真叻女！
為包包揀Job
徐榮表示包包一落地就會開Turbo跑，擔心她會跌親，因此要睇到實，他又讚女兒設計復活蛋有天份：「估唔到佢識唧嘢，佢依家好叻模仿。（講嘢叻唔叻？）識講單字，夾雜火星話，我惟有扮明，又用火星話答番佢，呢個階段幾得意。（包包有冇演藝天分？）佢識唔望鏡頭，幾自然咁，但現階段唔會再拍劇住，簡單出呢啲活動就會，都好多謝大家寵愛，好多廣告商錫包包，但有啲都要揀，小朋友嘢唔可以亂接，時間唔想太長，我哋又要試過OK先接。」
包包唔黐爸爸
徐榮表示近期開工時間長，收工時女兒已睡覺，因此要把握時間與女兒玩：「佢比較黐媽咪、外母，我惟有一有時間就安排啲新奇刺激玩意，等佢望吓我啦！都好矛盾，我搵錢返嚟，但個女都唔多望我。」
