羅敏莊．陳國邦 天賜腹中小龍女

陳國邦及羅敏莊夫婦的小龍女下個月就「面世」，這天和可愛的小小男model影相，鏡頭外二人都特別注意小model，完全表現出準父母的爆棚愛心。

2012年8月31日 673期3周刊 Lisa味道family
Cover story 親子專訪

text:mani photo:leung design:rex model:eddy
wardrobe:linea negra
special thanks:Little Egret Restaurant

龍年效應，街上的孕婦特別多，不少娛樂圈的女藝人都排住隊趕生龍B。初為人父母者，待產期間難免緊張、興奮又期待；不過，再過兩個多月就升級做媽媽的羅敏莊坦言心情平靜，就連準爸爸陳國邦都以平常心來迎接即將來臨的小生命。雖然如此，但他們已急不及待為腹中囡囡改了個搞鬼名字「陳禛」，可見兩人對即將出世的小龍女十分期待。

羅敏莊和陳國邦拍拖多年，在零九年拉埋天窗。

夫婦接受訪問時，羅敏莊不時說得哈哈大笑，是名開心果。

陳國邦說等陳禛出世後，只要不是工作，都一定會將囡囡帶在身邊，看來這甜蜜的二人世界，很快就會發展成幸福的三人行了。 陳國邦和羅敏莊向來恩愛，是圈內的模範夫妻。

現年三十八歲的羅敏莊，零九年與年長六歲的陳國邦拉埋天窗，一直都是圈內模範夫妻，人前人後都非常恩愛。默契十足的二人曾表明不會生小朋友，不過今年四月，當羅敏莊正為首個個人演唱會準備得如火如荼之際，二人的愛情結晶品卻悄悄地降臨，雖未至於殺媽媽一個措手不及，但對於毫無心理準備、又忙於演唱會的羅敏莊來說，都有過一刻「唔知點算好」！

羅敏莊向來開朗又率直，她表示起初感到作嘔作悶時，還以為是因為個唱籌備工作太過緊張而引起的生理反感，即使看過醫生都未有發現，直至一位女記者提醒可能「有咗」才恍然大悟，她說：「我當時第一個反應係『唔係啩』，有人話可能係由於休息不足『熱氣』所致，更即時叫助手去買龜苓膏食（註：大肚婆不宜吃的）；不過女記者建議我還是驗一驗，於是龜苓膏同驗孕棒都一齊買回來。」後來驗出有喜，龜苓膏就落入助手的肚中，「當時在場的人都好開心，偏偏我自己就沒有太特別嘅感受。」

對於入行十多年至今才開首個個人演唱會，這次演唱會的意義重大，她表示：「其實真係冇諗過會忽然有咗，加上當時實在太忙，我決定唔理咁多，顧掂個演唱會先。」話雖如此，但始終都是大肚婆，於是原本的快舞部分減少了，「本來要跳勁舞，佢哋就叫我郁吓就算。」說罷哈哈大笑起來。

百無禁忌

羅敏莊四月舉行首個個人演唱會，同時發現有了身孕。 老婆開騷，陳國邦當然到場兼上台以示支持。

中國人傳統怕胎兒小器，懷孕要足三個月才可以宣布有喜，不過向來都不迷信的羅敏莊一於少理，兩個幾月就在台上與fans分享喜訊，還有大肚婆諸多的禁忌，她亦沒有太上心，「其實開完演唱會之後都冇點樣特別進補，而大肚後生活同飲食習慣都冇乜大改變，好多人話呢樣唔食得、嗰樣唔做得，但我通通都冇理。」可能正因如此，懷孕期間的羅敏莊依舊樂觀和開心，並未有受到荷爾蒙的影響而變得情緒化。

不少新一代的夫婦，在婚前都表示不會生兒育女，但婚後心態卻慢慢改變，希望組織小家庭，羅敏莊和陳國邦亦然，於是「安全措施」鬆懈了，至「搞出人命」。

陳國邦：「其實我哋一齊已經有十年，以前朋友問會唔會生小朋友，我哋好直接會話唔要，到結咗婚又會覺得遲啲先算，再到後期嘅心態係有都唔拘。」可見兩人心理上已經有一定程度的準備，他說：「後期我哋嘅觀念係，如果個天安排要我哋有嘅話，咪生囉！」所以當後知太太有喜時，陳國邦的反應都非常冷靜。

「冇特別嘅感受，因為我哋都好成熟咁去迎接小生命嘅來臨，對於BB出世要用的物品、生活安排、教育方向、教養態度等都傾咗好多次，一切都喺掌握之內。」這時坐在旁邊的羅敏莊亦搭嘴說：「畢竟我哋年紀都唔細啦！」

夫婦二人凡事有商有量，準備充足迎接陳禛的來臨。

羅敏莊形容懷孕初期只覺肚子愈來愈大，就像有個call機在肚內震動，直至近期胎動比較強烈，才真正有將做媽媽的感覺。

懷孕近八個月的羅敏莊，身材未至臃腫，她亦不擔心產後修身的問題。

改名陳禛

電視劇中經常看到的畫面是，當知道老婆有喜，做老公的會開心到飛起，扶出扶入，呵護備至，要同腹中塊肉「傾偈」、「講故事」。陳氏夫婦二人在幕前當然亦演過如此的戲碼，不過，做戲還做戲，現實中有BB原來又是另一回事。羅敏莊說，最多食飯時會對住個肚皮同佢講「陳禛，食飯啦！」又或者上床前同佢講：「陳禛，訓覺啦！」陳禛？原來二人早為小龍女改好名字了。

「陳忽、陳土等搞笑嘅名都有諗過，不過最後決定叫陳禛，因為我太太好鍾意李小龍，又好欣賞梁小龍，而且兩個人都演過陳真一角，雖然只是個虛構人物，但民族英雄嘅形象深入民心，所以就用呢個名。之後我就選咗同音的『禛』字，因為『禛』有『大幸福』之意，亦是我哋對BB的祝福。」至於英文名，準爸爸表示就直譯叫做Jan Chan，簡單又直接，他笑謂：「我有位台灣朋友聽到後大讚，說Jan Chan的普通話發音就是『賺錢』，意頭太好了！」

陳禛仍未出世，對於教育和成長的事，當然是言之過早。不過，羅敏莊和陳國邦於初步的安排已經有共識，陳國邦說：「以前我嗰代嘅父母，不論生活還是教育上的照顧都好少，不過我哋唔覺得有問題或者有遺憾，因為知道佢哋都只不過為咗生活奔波；而現世代嘅父母會較注重孩子嘅心理成長，我都希望可以陪伴自己嘅小朋友成長，所以已經決定以後去邊都帶住陳禛，朋友食飯、做訪問、去旅行都好，除咗開工唔可以之外，去到邊都一定會帶佢係身邊。」羅敏莊補充：「要交俾工人照顧一定唔會放心，我哋會好好咁分工，邊個有時間就邊個做，而且我爸爸媽媽已經退休，當我哋兩個都要開工時，都可以幫到手。」

陳國邦指生B一切的事都在掌握之中，所以沒有擔心和緊張的心情。

羅敏莊坦言爸媽給了她幸福的生活，她亦將會給女兒幸福。

陳國邦小時與父母相處的時間不多，希望將來可陪伴女兒成長。

照片中的小小羅敏莊轉眼都已將為人母，年歲變、身分變，絲毫未變的是她教人看得開懷的笑臉。

不當虎媽

雖然生肖屬虎，但羅敏莊決不當虎媽，她吸取了自己的快樂童年經驗，說：「我同爸爸媽媽嘅關係好好，雖然住在公屋，搵錢唔多，但係佢哋俾到我嘅照顧都好足夠，放假會一家大細去旅行，我要學電子琴，佢哋又會買部好大嘅電子琴俾我練習，又供我去學畫畫，從來都唔會迫我去學我冇興趣嘅嘢。我喺幸福嘅家庭長大，亦有信心俾陳禛一個幸福嘅家庭，希望佢可以係無壓力嘅環境下快樂成長。」

夫婦二人都有隨遇而安的性格，問到可會考慮再多生一個，羅敏莊不作聲地擰擰頭，而陳國邦則表示都有想過，他說：「有次同家人閒聊，講起生多個小朋友陪陳禛好唔好，我有一個已經十二歲、獨生的姨甥仔即時就話：『好呀，有時我都想有人陪吓。』所以都有呢個諗法。」但對於將來的事，二人都表示要看看陳禛的性格和成長，之後再作打算。

羅敏莊表示以前雖然住公屋，但父母盡量給她快樂無憂的生活。

與小model拍照，羅敏莊甚為鬼馬，夫婦二人與小朋友玩個不停。