林嘉華、馬德鐘、陳國邦 男人最疼最痛
（左起）林嘉華、馬德鐘和陳國邦日前帶同「另一半」出動，大談他們男人最疼。
無綫劇集《女人最痛》後晚播出大結局，為力谷收視，劇中三位男主角馬德鐘、林嘉華和陳國邦不惜帶同他們絕少曝光的「另一半」接受記者專訪。三個大男人當日分別駕駛心愛座駕聚在一起大講男人最疼車經，威力絕不比三個女人一個墟遜色。
除太太、子女和家人外，大部份男人最疼錫莫過於其心愛座駕，林嘉華、馬德鐘和陳國邦也不例外。為宣傳後晚《女人最痛》大結局，三個大男人日前特地帶同他們的心愛座駕到將軍澳接受本報專訪，其中馬德鐘的「另一半」為 Audi Q7七座位四驅車，林嘉華的愛車是 Audi A4房車，陳國邦的愛車則車身小巧的三菱 i K car。
林嘉華：我乞人憎
林嘉華與陳自瑤（左）大搞婚外情，對米雪造成重大傷害。劇照
陳國邦一見馬德鐘和林嘉華的「老婆」即大讚二人將愛車打扮得十分企理，自己實自嘆不如，其間三個男人一埋首即大講車經，交換打理汽車心得。
《女》劇今個星期進入結局篇，飾演錢曠龍的林嘉華，雖然有高齡米雪為他冒險生仔繼香燈，可惜仍抵受不住陳自瑤的引誘而發展婚外情，不少網友指無綫台慶頒獎禮若增設「最乞人憎角色」，林嘉華實在當之無愧。對此林嘉華說：「係 o架，每個戲一定好多話題，不過今年好特別，連埋《鐵馬尋橋》在內，兩部戲都係做奸人，不過點都係《女人》嘅錢矌龍乞人憎，尤其係女性嘅觀眾。」他續說：「事實上我接劇本嗰陣已經知，仲專登走去做咗啲資料搜集，我將劇本原有嘅劇情再加深啲，所以我拍嗰陣預咗個角色會俾人憎。」
馬德鐘：一無所有
馬德鐘劇中慘被張可頤背叛。劇照
提到故事最後發展，劇中情路坎坷的馬德鐘，被問到與張可頤的關係時，他笑說：「呢啲都可以叫男人最痛，第一個老婆原來係同性戀，到我遇到可頤，我將所有感情付出晒畀佢，不斷體諒同愛佢，但係返嚟嘅嘢係俾佢背叛我，仲食晒我所有嘢㖭！」林嘉華也說：「我又唔可以話係乜都冇，佢（米雪）最後都幫我生咗個仔，只係冇走番埋一齊。」陳國邦則笑說：「三個之中我係最善終，由初初鄙視滕麗名、作弄、到欣賞、相愛，一直都保護呢個女人，可以話係大團圓結局。」
《女》劇中，米雪、張可頤和滕麗名分別道出不同階段所要面對的女人最痛，林嘉華、馬德鐘和陳國邦也談到男人最痛，林嘉華說：「男人永遠唔會好清晰咁話畀女人知諗緊乜嘢，佢成日當女人會明白，所以我覺得男人最痛係：點解女人會唔明白？好細節嘅嘢男人係唔會做，偏偏女人就好介意呢樣，但係男人會覺得你應該明白，唔係因為我滿足晒你啲要求先代表到我愛你，咁都算痛 o架。」
陳國邦：不能軟弱
陳國邦與滕麗名將大團圓結局。劇照
陳國邦覺得男人痛一定來自心靈上，他說：「最痛係負擔，如果老婆搵錢多過老公，又或者對外嘅學歷同社會地位高過男性好多，佢身邊嘅男人一定會覺得好痛，呢種痛係精神上嘅壓力，唔知呢啲係咪傳統抑或基因問題，男人好少會同人講，唔想表露好軟弱嘅一面畀人睇。」
在旁的馬德鐘禁不住說：「男人好鍾意啞仔食黃連，有乜都要啃，點都要受。呢一下我覺得真係幾辛苦，可能有時啲嘢講出嚟同人分擔吓會好過啲，不過去到呢個環境又唔知點樣講出嚟，講出嚟又覺得自己好軟弱，唔希望俾人見到呢一方面，但係自己又頂唔住，真係有苦自己知。」