陳國邦 逆流而上

“我係對面馬路,你應該見到我!”透過電話尋找目標方位,好不容易從逆流人群中認出陳國邦,他身穿簡單米色冷外套加條牛仔褲,沒有為拍攝訪問作刻意打扮。

“我平時就係咁樣落黎深水埗,行黃金、鴨寮街,相比我讀書時,而家變了好多……直至現在一星期仍會過來兩、三次。”如數家珍:目睹電子零件沒落不禁黯然、購買電螺絲批精挑細選儼如專家、介紹最新電腦遊戲熱情如sales,但偏偏拍照不肯笑。

這就是陳國邦,不矯飾,表現最真實一面,卻如逆刃刀威脅自己的前途。

“引用《友緣相聚》中何琍琍的一句話:‘如果你行出街同普通人冇分別,你又點係一個明星?’我想紅,但偏偏唔識得包裝,影相唔識對鏡頭笑。邊度會有明星會鐘意行深水埗、鴨寮街、新填地街?為什麼要去買螺絲批而唔係去名店買衫?去disco唔social而係睇書咁顛?”

堅持自我,不隨波逐流,陳國邦多年來在二線位置逆流而上,以藝員應有的演技,用知識、實力去追求成功,目標簡而清——紅。

中招



細個我成日整蠱造怪,係中學時興「楊過」,我就用這種感覺去上課,收埋隻手,另一隻手托住半邊面。所以被國文老師稱呼我做「傻豹」。沿用至演藝學院,更簡化為「阿豹」,劉雅麗而家都係咁叫我。

當係佬的我,跟了哥哥就讀中華廠商會聯合職業先修訓練學校,修讀三年制的金屬薄片工程,當時鑊鏟、水兜、垃圾鏟都是自己用薄片打造出來,令我鐘意落手落腳的工作:如修車、地盤鋤地等。更不時落鴨寮街買電子零件,試過買電板自畫電路自製收音機,時至今天令我愛上DIY家具裝修,所以家中收集了不少裝修器械,更不時到新填地街欣賞搜購最新的工具。

中三畢業,想報考理工大學,畢業後當工程師,便轉到升學較好的文化學校——屯門的東華三院丘子田紀念中學。卻讓我考入演藝學院,我信相是天意的安排。那年演藝學院創校招生,於本校作示範介紹。全體中五學生看表演時,校長突然站起身想中止表演,要我們回課室上課。我既驚喜又興奮:“嘩!校長同人鬧交,有的看了!“原來是刻意安排的即興劇。

演戲竟然可以促動情緒起落,咁大件事原來係假的!我開始懷疑,演技到底是怎樣的一門學問?點解要讀四年咁耐呢?純粹好奇心,加上第一次睇話劇的震撼,所以就轉考演藝學院。

苦讀

中五畢業便脫離屋企經濟支持,為了慳車錢去灣仔上堂,我由屯門搬到深水埗同學家住,每日做幾份唔同工作:每早淩晨四點起身焗蛋撻、賣麵包到七點就去返學,上完堂下午在學院的飯堂洗碗,夜晚放學不用排戲就到藝術中心或者學校舞臺當收銀員和帶位,星期五、六、日更到超級市場落貨。加上申請助學金、獎學金和免息貸款,去維持生計和交學費。


家人(左二哥、右大哥)對我由細到大一直好信任,讀書、工作,甚至私生活都好自由,所以當時並沒有反對我報讀演藝學院。

看似是非人生活,你會問我點捱過去?我又唔覺得好辛苦,隔籬鄰舍就是如此刻苦,父母出外工作,所有柴米油鹽都是在雜貨鋪賒數,百幾呎單位住六個人。我反而慶倖在如此環境中長大,可以承受更多,反而開心。你看同學要畀錢食飯,我洗兩隻碗執下野,碟飯任我食乜,餐餐都雞扒、牛扒、香腸好豐富,唔使錢吃飯仲有錢賺。十幾歲的後生仔精力好厲害,邊識得攰,而家踩三、四晚通宵就可能會死,好彩娛樂圈訓練有素,都仲撐得住。

崎嶇

未畢業,無線已找我拍實況劇的單元《不要回頭》,同時拍了由李修賢監製的電影《壯志雄心》,入圍「臺灣第屆廿六屆金馬獎最佳男配角」。兩邊都有簽約意願,當時尚算年輕,靚仔樣,電視圈應該比較多機會。入了電視臺拍了《愛生事家庭》、《我愛玫瑰園》等劇,飾演「細佬」角色,但做了四年都停滯不前。九三年離開了無線,轉投電影圈,憑《飛虎雄心》被外界認同我已經長大,更提名「第十四屆香港電影金像獎最佳男配角」,接緊一口氣拍了廿多部電影,輾轉之下返了內地拍劇,起初都幾好景。但九七金融風暴後死了很多老闆,同時推出了「配額政策」,我剛加入未建立到主角位置,還在二線向上爬,就要即時走人。最後二千年返回無線,一直到而家。

娛樂圈好簡單,紅就等於成功,所以我的目標就是紅,但追求的方法唔同。我唔識裝扮自己,唯有增進各方面學識去鞏固實力,話畀人聽怎樣才是好演技,非死背對白,而是學問的支援理解對白的真正意思,希望用這方法達到紅。當然整天被關心我的朋友訓話:「收收埋埋,又唔包裝,行出街同隔籬陳仔冇分別。」我知道條路難行,亦唔知會唔會成功?但到這階段,我似乎又行到條路出來,可能仲爭一步,看看有沒有人賞識。

我好鐘意睇書,之前飾演過玄學家,我看《易經》瞭解八卦同如何做手勢數指算。近來睇《中國古代禮儀制度》,如果我在演《爭霸》時看了此書更好,瞭解更多春秋時禮節,令文種更靈活真實。
在網友的支持下,我信相選擇的路向是行得對的,起碼有人會留意我真的用心去演戲,我在二線都可以得到肯定,若我紅了,就可以令更多人明白什麼才是演技、表現、戲劇。

出處:TVB周刊 感謝Polly提供