羅敏莊認與陳國邦拍拖

羅敏莊與陳國邦戀情被踢爆，女方甜笑謂：「唔夠三個月唔講，係怕小器！」

羅敏莊與陳國邦拍拖消息，最近被傳媒踢爆，女方被指否認，昨日羅敏莊出現，強調自己冇否認戀情，只是該周刊事後未有訪問她；記者順勢求證，羅敏莊起初帶笑扮聾謂：「咩話？」但最後都承認了與陳國邦之戀情。

甜如蜜糖

熱戀情侶剛開始，當然是紙包不住火，羅敏莊笑得甜如蜜糖，坦言雙方已經開始了一段時間，並笑謂：「唔夠三個月咪唔講囉……怕小器嘛！（繼續不避嫌與男友出街？）會，我哋又唔係偶像派，咁大個人，拍拖好正常。」

不過，這對小口子將於稍後要因工作而分隔兩地，六月中，羅敏莊將到北京演出為期兩個月的無線重頭劇《血薦軒轅》外景，問可擔心會兩地相思而影響感情？羅敏莊以生仔來比喻拍拖，她謂：「後生仔女，工作緊要，感情呢啲嘢……好似生BB咁，係你就係你，要分就分，要離就離，只能夠順其自然啫！」

羅敏莊最近俾傳媒揭發同陳國邦拍拖，其實佢年紀都唔細，拍吓拖都好正常嘅，佢自己都話人哋冇訪問過佢，都唔會唔認。其實羅敏莊同陳國邦都開心咗一陣子0架喇，但係最搞笑嘅係，佢話最好拍夠三個月拖先公開戀情喎，你估係生仔咩？巴吱閉真係估唔到佢後生細仔，竟然會有咁嘅念頭。

聽講遲啲羅敏莊就會去北京做嘢，而男朋友陳國邦就會過上海，一對情人拍拖冇耐就要分開，巴吱閉真係戥佢哋擔心，不過阿莊就話冇得驚咁多，要嚟就嚟，要分就分喎。